Franski spítalinn hlýtur menningarverðalaun Evrópu
Minjavernd hefur hlotið menningarverðlaunin Europa Nostra á sviði menningararfleifðar fyrir enduruppbyggingu og um umbreytingu Franska spítalans á Fáskrúðsfirði í safn. Er þetta í fyrsta sinn sem íslenskt verkefni hlýtur þessi virtu verðlaun.
Franski spítalinn hýsir í dag fjölbreytta safna- og hótelstarfsemi.
Í ár bárust alls 187 tilnefningar til verðlaunanna, sem eru veitt í fjórum flokkum eða fyrir varðveislu og verndun, rannsóknir, óeigingjarnt framlag og fræðslu, þjálfun og upplýsingamiðlun.
Minjavernd hlaut verðlaunin í flokki varðveislu og verndunar ásamt 11 öðrum verðlaunaverkefnnum á m.a. Grikklandi, Hollandi, Spáni og Bretlandi.
Franski spítalinn er hluti af umfangsmiklu verkefni sem Minjavernd hefur leitt á Fáskrúðsfirði við endurgerð á húsum sem reist voru í kringum aldamótin 1900.
Í frétt frá Minjavernd segir m.a. áhugi hafi vaknað árið 2008 á endurgerð Franska spítalans í samstarfi við Fjarðabyggð, en þá var þetta sögufræga hús staðsett á Hafnarnesi í Fáskrúðsfirði. Ákveðið var að flytja húsið nálægt upprunalegri staðsetningu við Hafnargötu og að endurgera samhliða fjögur önnur sögufræg hús á Fáskrúðsfirði eða Læknishúsið, Litlu kapelluna, Líkhúsið og Sjúkraskýlið.
Frönsku húsin á Fáskrúðsfirði voru tekin í notkun árið 2014, en auk safnsins Frakkar á Íslandsmiðum hýsa þau Fosshótel Austfirði og veitingastaðinn l'Abri.
Europa Nostra eru menningarverðalun Evrópusambandsins og eru ein virtustu verðlaun heims á sínu sviði. Forseti Europa Nostra er óperusöngvarinn þekkti, Plácido Domingo. Afhending verðlaunanna fer fram 24. maí í Zarzúela leikhúsinu í Madríd.
Almenningi gefst kostur að kjósa um eitt af verðlaunaverkefnum Europa Nostra og hlýtur það verkefni sem fær flest atkvæði Public Choice Award. Kosið á á: http://vote.europanostra.org/.
Fleiri myndir:Hér má sjá Litlu kapelluna og Sjúkraskýlið, sem eru hluti af frönsku húsunum sem hafa verið endurreist á Fáskrúðsfirði. Fjær má sjá glitta í gaflinn á Læknishúsinu.Franski spítalinn gegni veigamiklu hlutverki fyrir fiskveiðar Frakka hér við land, sem stóðu yfir um þriggja alda skeið eða frá 1614 til 1914.Franski spítalinn var fluttur út á Hafnarnes við Fáskrúðsfjörð árið 1939. Hér má sjá ástand hússins um það leyti sem verkefnið hófst.
