Nemendur grunnskólans á Fáskrúðsfirði heimsækja Loðnuvinnsluna
Í gær fóru nemendur unglingastigs grunnskólans á Fáskrúðsfirði í heimsókn í Loðnuvinnsluna þar sem þau fengu kynningu á starfsemi fyrirtækisins. Nemendum var skipt upp í hópa og fengu þau bæði kynningu og að prófa mismunandi störf í deildum fyrirtækisins. Deildirnar sem tóku á móti þeim voru rafdeild, frystihús, vélaverkstæði, bræðslan, skrifstofan og Hoffellið. Um borð í Hoffellinu fengu þau kynning á þeim fjölbreyttu störfum sem þar eru unnin.
Nemendur grunnskóla Fáskrúðsfjarðar
Eftir kynningarnar fengu allir nemendur veitingar í Wathneshúsinu en þar var í boði pizzur, gos og nammi í eftirrétt. Það að ná að láta svona dag verða að veruleika krefst mikils skipulags og lagði mikið af starfsfólki Loðnuvinnslunnar vinnu sína til hliðar til að taka á móti nemendunum okkar. Við viljum enn og aftur þakka Loðnuvinnslunni og öllu starfsfólkinu kærlega fyrir daginn enda var hann bæði fræðandi og ánægjulegur. Það er ómetanlegt fyrir skólastarfið að fá kynningu sem þessa fyrir nemendur.
Dagur eins og þessi styður við markmið sem verið er að ná fram með markvissri náms- og starfsfræðslu í skólanum, með henni verða nemendur færari í að takast á við breytilegar aðstæður sem byggja á sjálfsþekkingu og færni. Fjölbreytt innsýn í raunverulegt atvinnulíf gefur nemendum vitneskju sem nýtist þeim bæði nú og til framtíðar. Einnig gerir slík innsýn nemendur hæfari í að afla sér upplýsinga og takast á við skil milli skólastiga eða skóla og atvinnulífs.
