Um Fjarðabyggð

Fjarðabyggð er kraftmikið sveitarfélag á Austfjörðum. Það býr yfir sterku atvinnulífi í traustu og fjölbreyttu samfélagi, umvafið stórbrotinni náttúru. Kjörorð Fjarðabyggðar, Þú ert á góðum stað, merkja skuldbindingu þess að bjóða íbúum upp á framúrskarandi þjónustu, öflugt skóla- og frístundastarf þar sem íþrótta- og tómstundastarf er til fyrirmyndar og menningarlíf fær að blómstra.
Um 5.500 íbúar í sjö bæjar-kjörnum gera sveitarfélagið eitt það víðfeðmasta á landinu. Hver kjarni hefur sína sérstöðu, menningu og sögu en saman mynda þeir sterka heild og samheldið samfélag.

Í Fjarðabyggð liggur sterkur grunnur atvinnu- og verðmætasköpunar með öflugum höfnum, stóriðju og nýsköpun en þar býr líka yfirgripsmikil þekking og aðlögunarhæfni sem felur í sér ótal tækifæri. Sveitarfélagið ásetur sér að styðja við frumkvæði einstaklinga og áframhaldandi framþróun samfélagsins. Þannig sköpum við umhverfi þar sem allir íbúar fá tækifæri til að dafna.

Bæjarkjarnar sveitarfélagsins eru sjö talsins og jafnan kenndir við firðina eða víkurnar sem þeir standa við. Það er þó ekki einhlítt. Norðfjörður er fjölmennasta byggðin, með um 1.500 íbúa, en minnst er Brekkuþorp í Mjóafirði með 15 íbúa. Á Eskifirði eru íbúar um 1.000 talsins og tæplega 1.300 búa á Reyðarfirði. Á Fáskrúðsfirði eru íbúar um 700, um 200 manns búa á Stöðvarfirði og í Breiðdal búa einnig um 200 manns.

Fjarðabyggð byggir á sterkum grunni hvað atvinnu- og verðmætasköpun varðar. Gjöful fiskimið eru undan ströndum Austfjarða og er útgerð og vinnsla sjávarafurða ein af meginstoðum atvinnulífsins ásamt álframleiðslu og tengdum þjónustugreinum. Verslun og þjónusta gegna einnig mikilvægu hlutverki og hefur ferðaþjónusta vaxið hratt á undanförnum árum. Þá jókst mikilvægi landbúnaðar í Fjarðabyggð árið 2018 með sameiningu sveitarfélagsins við landbúnaðarhéraðið Breiðdal.

Hver bæjarkjarni á sér sína sögu og hefðir og erlend tengsl leynast víðar en í „Franska bænum“ Fáskrúðsfirði. Eskifjörður er stundum nefndur „Norski bærinn“ út af umsvifum norskra útvegsmanna fyrr á tímum, auk þess sem Norðmenn ráku stóra hvalveiðistöð á Asknesi í Mjóafirði. Um Norðfjörð segja heimamenn að hann sé „þar sem lognið hlær svo dátt“. Reyðarfjörður er aftur á móti „þar sem hjartað slær“ – á Austfjörðum miðjum. „Steinaríkið Stöðvarfjörður“ vísar svo til jarðsögulegrar sérstöðu svæðisins og „Breiðdalur brosir við þér“ þar sem þú ert ætíð velkomin/n.