Vorúthlutun úr styrktarsjóði Alcoa Fjarðaráls og samfélagssjóði Alcoa fór nýlega fram í Kirkju- og menningarmiðstöðinni á Eskifirði. Hæstu styrkina hlutu Björgunarsveitin Hérað og Veraldarvinir, en aldursforseti styrkiþega var Vilhjálmur Hjálmarsson.
Styrkþegar saman komnir í Eskifjarðarkirkju. Fremstur fyrir miðju er Vilhjálmur Hjálmarsson, fyrrv. ráðherra sem hlaut ásamt bókaútgáfunni Hólum styrk til útgáfu á Örnefnum í Mjóafirði, bók sem Hólar munu gefa út. Þess má geta að bókin hefur verið í vinnslu í 70 ár. Vilhjálmur hefur einsett sér að koma bókinni út áður en hann verður 100 ára í haust.
Vorúthlutanir styrkja úr Styrktarsjóði Alcoa Fjarðaáls og Samfélagssjóði Alcoa (Alcoa Foundation) fóru fram í Kirkju- og menningarmiðstöðinni á Eskifirði þann 14. maí. Að venju voru veittir styrkir af fjölbreyttum toga, bæði á sviði íþrótta- og menningarmála, en einnig á sviði mennta- og ferðamála.
Alcoa Fjarðaál veitti 29 styrki, alls að upphæð 21 milljón króna. Hæsta styrkinn frá Styrktarsjóði Alcoa Fjarðaáls hlaut að þessu sinni Björgunarsveitin Hérað, eina milljón króna, vegna kaupa á sérstakri búnaðarkerru til nota við hópslysabjörgun. Í kerrunni verða meðal annars sjúkrabörur, teppi, spelkur og annar nauðsynlegur sjúkrabúnaður. Með styrknum vill Fjarðaál styrkja enn frekar getu björgunarsveitanna á svæðinu til að takast á við umfangsmiklar björgunaraðgerðir. Á vegum Alcoa Foundation voru veittir tveir styrkir, annars vegar til Veraldarvina og hins vegar í nýtt verkefni Alcoa hér á landi sem nefnist Synir og dætur (Sons & Daughters) og er sá styrkur ætlaður börnum starfsmanna Alcoa sem eru á leið í háskólanám.
Veraldarvinir hlutu 25 þúsund dollara styrk, um 2,8 milljónir króna, vegna starfsemi samtakanna á Austurlandi. Veraldarvinir eru íslensk félagasamtök sem rekin eru án hagnaðarsjónarmiða og vinna að margvíslegum samfélagsverkefnum árið um kring um allt land. Á þessu ári gera samtökin ráð fyrir að taka á móti 1.500 erlendum sjálfboðaliðum til að starfa við 130 tveggja vikna verkefni, þar af um 650 manns vegna verkefna í Fjarðabyggð.
Marteinn Gauti Kárason hlaut styrk til háskólanáms samtals 4000 dollara, tæpa hálfa milljón króna, sem greiddur verður á næstu fjórum árum. Marteinn er að ljúka námi í Menntaskólanum á Egilsstöðum og hyggst hefja nám í viðskiptafræði í haust.
Vert er að geta þess að aldursforsetinn í hópi styrkþega var Mjófirðingurinn Vilhjálmur Hjálmarsson fyrrv. ráðherra en hann verður 100 ára í haust. Vilhjálmur hlaut styrk fyrir væntanlega bók sína, Örnefni í Mjóafirði. Markmið Vilhjálms er að koma bókinni út fyrir stórafmælið en bókin á sér langan aðdraganda þar sem Vilhjálmur greindi frá því að hann hefði byrjað á henni fyrir 70 árum, árið 1944.
Fleiri myndir:Kjartan Benediktsson (t.v.) tekur við styrk fyrir hönd Björgunarsveitarinnar Héraðs.F.v. Dagmar Ýr Stefánsdóttir hjá Alcoa Fjarðaáli, Þórarinn Ívarsson, framkvæmdastjóri Veraldarvina, Marteinn Gauti Kárason og Magnús Þór Ásmundsson hjá Alcoa á Íslandi.Þeir Stefán Már Guðmundsson og Hjálmar Jóhannesson voru kampakátir þegar þeir tóku fyrir styrk fyrir verkefni sem kallast Orkuboltar.
