Líkt og fram hefur komið í fréttum gekk mikið ofsaveður yfir Stöðvarfjörð sl. fimmtudag, sem olli margvíslegum og miklum skemmdum víða í bænum. Starfsmenn Fjarðabyggðar ásamt verktökum og íbúum unnu í gær ötulega að hreinsunarstarfi og viðgerðum í bænum, og gekk sú vinna afar vel. Ljóst er þó að einhvern tíma mun taka að koma öllu aftur í samt horf, og mun hreinsunar- og viðgerðarstarf halda áfram næstu daga.
08.02.2025
Hreinsunarstarf á Stöðvarfirði gengur vel
Þá voru ráðgjafar fjölskyldusviðs Fjarðabyggðar ásamt fulltrúa Rauða Krossins með viðveru í Balaborg á Stöðvarfirði í gær, og ræddu við þá gesti sem þangað mættu.
Vakin er athygli á því að gámavöllurinn á Stöðvarfirði verður opin í dag, laugardaginn 8. Febrúar frá kl. 10 - 16, og eru íbúar hvattir til að nýta sér það til að losna við rusl sem enn má víða finna í görðum og við hús.
Ljóst er að umtalsvert eignatjón hefur orðið víða og eru íbúar hvattir til að tilkynna allt tjón til sín tryggingafélags.
Fjarðabyggð vill að lokum koma á framfæri þakklæti til íbúa, starfsmanna, verktaka og viðbragðsaðila sem hafa komið að vinnu á Stöðvarfirði síðustu daga.