Spáð er ofsaveðri eða fárviðri austantil á landinu í nótt og í fyrramálið, fyrst suðaustanlands. Í nótt gæti vindur náð fárviðri eða allt að 33 m/s á Austfjörðum, segir í viðvörun frá veðurfræðingum Veðurstofu Íslands.
29.12.2015
Áframhaldandi vatnsveður í Fjarðabyggð
Samfara svona veðurhæð, lágum loftþrýstingi og stöðu sjávarfalla ( flóð eftir miðnætti austantil á landinu) má búast við að sjávarstaða verði talsvert há og eru eigendur báta hvattir til að tryggja báta sína. Einnig er fólk hvatt til að festa lausamuni.
Þetta kemur fram á vef Veðurstofu Íslands og þar er fólk hvatt til að fylgjast vel með veðurspám því braut lægðarinnar þurfi ekki að breytast mikið til þess að spárnar breytist mikið. Einnig kemur fram að búast megi við talsverðri úrkomu á Austfjörðum. Mikill vatnsveður hefur verið víða á Austfjörðum og má búast við áframhaldandi vatnsflaumi ef spáin gengur eftir.
Foreldrar leikskólabarna eru beðnir um að fylgjast vel með tilkynningum snemma í fyrramálið um hvort leikskólar verði opnir.