Bæjarstjórn Fjarðabyggðar fordæmir harðlega innrás rússneskra stjórnvalda í Úkraínu. Bæjarstjórn lýsir yfir fullum stuðningi við úkraínsku þjóðina og þær aðgerðir sem alþjóðasamfélagið hefur gripið til gegn yfirvöldum í Rússlandi. Vegna stríðsins í Úkraínu bætist nú enn við þann mikla fjölda fólks sem er á flótta í heiminum. Bæjarstjórn lýsir sig reiðubúna til að leggja sitt af mörkum til að aðstoða fólk á flótta og hvetur stjórnvöld eindregið til að bregðast hratt við ákalli alþjóðastofnana um slíka aðstoð.