Aðilar gerðu með sér samkomulag til eins árs um auknar eldvarnir snemma sumars 2016 og hófst undirbúningur verkefnisins um haustið. Fengu starfsmenn sveitarfélagsins þá fræðslu um eldvarnir á vinnustað og heima fyrir. Skipaðir voru eldvarnafulltrúar í stofnunum sveitarfélagsins og Fjarðabyggð innleiddi eigið eldvarnaeftirlit í nóvember.

Guðmundur Helgi telur að samstarfið hafi skilað vakningu í eflingu eldvarna í stofnunum Fjarðabyggðar. Að auki hafi endurbótum og eftirfylgni með lagfæringum á eldvörnum verið betur sinnt þar og starfsmenn hafi frekar auga með slíku.

Hann er einnig sannfærður um að fræðslan hafi skilað sér í bættum eldvörnum á heimilum starfsfólks og byggir það meðal annars á samtölum við seljendur eldvarnabúnaðar á svæðinu. Niðurstöður spurningakönnunar sem lögð var fyrir eldvarnafulltrúa Fjarðabyggðar benda eindregið til þess að verkefnið hafi skilað árangri í bættum eldvörnum á heimilum og vinnustöðum og kemur þar fram ríkur vilji til að halda eigin eldvarnaeftirliti í stofnunum Fjarðabyggðar áfram.

Greinargerðin hefur verið kynnt í stjórn Eldvarnabandalagsins. Hún var einnig kynnt í bæjarráði Fjarðabyggðar í vikunni og var slökkviliðsstjóra falið að útfæra eftirfylgni verkefnisins.