Á Eskifirði þurfti einnig að rýma hús vegna hættu á skriðuföllum að kvöldi föstudagsins 18.desember. Komið hafði í ljós að sprungur í og við veginn yfir Oddsskarð, ofan byggðar á Eskifirði, höfðu stækkað og rýming húsa vegna þess var talin nauðsynleg.  Þar eins og á Seyðisfirði brugðust íbúar vel við og rýming svæðisins gekk vel. Sem betur fer kom ekki til þess að flóð færi af stað og er það mikil mildi. Verið er að meta aðstæður og er tíðinda að vænta þegar líða tekur á daginn en þangað til verður svæðið sem rýmt var lokað.      

Það hefur verið aðdáunarvert að fylgjast með fumlausum viðbrögðum íbúa og viðbragðsaðila á Austurlandi við þeim atburðum sem hér hafa átt sér stað. Það er á svona stundum sem hvað best sést hvað það góða samfélag sem við búum í á Austurlandi getur áorkað. Rétt er að nota tækifærið og koma á framfæri kærum þökkum til allra þeirra sem að málinu komu, bæði íbúum og viðbragðsaðilum.

Mikil mildi er að ekki skyldi verða manntjón á Austurlandi í þeim hörmungum sem hér gengu yfir, en eignatjón er gríðarlegt. Bæjaryfirvöld í Fjarðabyggð hafa árum saman barist fyrir því að framkvæmdum við ofanflóðavarnir verði haldið áfram og tryggt sé að það fjármagn sem til staðar er í Ofnaflóðasjóði verði nýtt til að ljúka uppbyggingu varnarmannvirkja um allt land hið fyrsta. Nauðsynlegt er að halda því áfram og leggja enn frekari áherslu á uppbygginguna. Það er ekki boðlegt að bjóða íbúum þeirra svæða sem búa við hættu á ofanflóðum, að varnarmannvirki séu ekki til staðar til að verja íbúana og eignir þeirra.

Jón Björn Hákonarson, bæjarstjóri Fjarðabyggðar