Geðræktarmálþingið „Hvað segirðu gott?“ fór fram fyrir fullu húsi í Nesskóla, Neskaupstað, um síðastliðna helgi. Um 300 manns sóttu málþingið, þar sem fjallað var um geðrækt út frá mismunandi sjónarhornum.
16.03.2016
Hvað segirðu gott?
Málþingið skiptist í tvo hluta. Fyrri hlutinn fór fram á föstudagskvöldinu og var ætlaður ungmennum á aldrinum 16 – 20 ára. Síðari hlutinn var helgaður málþingu, sem fram fór á laugardeginum og var öllum opið.
Á málþinginu komu fram sterkar persónur með reynslusögur, erindi og gjörninga. Nemandi fjallaði m.a. um baráttu sína við þunglyndi og aðstandandi deildi reynslu sinni í kjölfar sjálfsvígs. Einnig flutti Salóme Rut erindi um lífsánægju og starfsumhverfi sjómanna og Petra Lind Sigurðardóttir hélt erindi um líkamsímynd og átraskanir.
Þá framkvæmdu nemendur frá Listaakdemíu VA gjörninga þar sem þeir túlkuðu á magnaðan hátt þær tilfinningar sem þeir hafa glímt við s.s. einelti og kvíða.
Það var síðan Logi Geisson fyrrum landsliðsmaður í handknattleik sem sló botninn í þetta fjölsótta málþingið með erindi um sjálfstraust og markmiðssetningu.
Að málþinginu stóðu forvarnarteymi VA, foreldrafélög VA og Nesskóla og fjölskyldusvið Fjarðabyggðar. Páll Björgvin Guðmundsson, bæjarstjóri Fjarðabyggðar, bauð málfundargesti velkomna, en fundarstjóri var Þóroddur Helgason, fræðslustjóri.