Jóna Árný fór stuttlega yfir forsögu garðsins en nákvæmlega 90 ár voru liðin frá því að Kvennfélaginu Nönnu var afhentur reiturinn til ræktunar þann 2. ágúst 1934. Garðurinn er merkilegur fyrir margra hluta sakir en einna helst þá staðreynd að hann var gerður á þeim tíma sem almennt var lítið um slíka yndisreiti. Kvenfélagið Nanna á allan heiðurinn að tilurð þessa garðs og unnu félagskonur að þróun garðsins og uppbyggingu bæði með sjálfboðavinnu í garðinum en ekki síður með fjármögnun uppbyggingar s.s. með því að halda fjáröflunarball o.fl.

Lystigarðurinn á ekki bara merkilega sögu heldur er hann líka einstakur hvað varðar stíl og gerð enda byggður í miklum halla og til þess að fá sléttar flatir var hlaðið undir hverja flöt fyrir sig. Þessi mótun stalla þótti nýlunda á þessum tíma og er enn einkenni garðsins í dag. Á upphafsárunum fékk kvennfélagið m.a. til samstarfs við sig Eyþór Þórðarson, en hann var mikill garðyrkjuáhugamaður og hafði lært garðyrkju sem var óvenjulegt á þessum tíma.

Jóna Árný sagði meðal annars í ávarpi sínu:

Garðurinn hefur þróast í gegnum tíðina, en hefur ávallt haldið í rætur sínar. Það hefur verið mikil sjálfboða-vinna lögð í að viðhalda honum og tryggja að hann haldi áfram að vera staður sem allir geta notið. Í dag er garðurinn jafnvel enn mikilvægari en nokkru sinni fyrr, þar sem hann býður upp á kærkomið skjól í hraða nútímans. Við sem heimamenn þurfum að vera duglegri að dvelja í þessari fallegu perlu í hjarta bæjarins. Hann er dýrmætur hluti af menningu okkar og sögu, og það er mikilvægt að við hlúum að honum áfram, svo komandi kynslóðir geti einnig notið hans. Hann er áminning um það að með samstöðu og samvinnu er hægt að skapa eitthvað sem varir um ókomna tíð.

Enn þann dag í dag stendur Kvennfélagið vörð um garðinn og sinnir ýmsum úrbótaverkefnum honum tengdum. Tilkynnti formaður kvennfélagsins við þetta tilefni að til stæði að setja nýja lýsingu í garðinn sem félagið hefði fengið styrk til að koma upp frá SÚN.