Um er að ræða viðaukasamning við sóknaráætlun Austurlands sem gerður er á grunni stefnumótandi byggðaáætlunar fyrir árin 2018-2024, nánar tiltekið aðgerð C.1 Sértæk verkefni sóknaráætlunarsvæða. Undir þeim flokki eru verkefni styrkt sem líkleg eru til að hafa varanleg og veruleg jákvæð áhrif á þróun byggðar og búsetu.

„Það er verulega ánægjulegt að tekist hafi að tryggja fjármagn til að ljúka endurbótum á húsnæði Sköpunarmiðstöðvarinnar. Með þessu fé verður hægt að ljúka við endurbætur hússins sem unnið hefur verið að síðustu ár svo það nýtist starfseminni sem best. Sköpunarmiðstöðin, og það fólk sem þar starfar, hefur lyft grettistaki við að efla samfélagið á Stöðvarfirði og með þessum áfanga nú er ég þess fullviss að starfsemi miðstöðvarinnar mun eflast og dafna ennfrekar, samfélaginu á Stöðvarfirði og í allri Fjarðabyggð til heilla“ sagði Jón Björn Hákonarson að lokini undirritun samkomulagsins í gær.

Sköpunarmiðstöðin á Stöðvarfirði er tilraunaverkefni á sviði menningar, menntunar og atvinnusköpunar. Á undanförnum árum hefur verið ráðast í miklar endurbætur á húsnæðinu sem áður var frystihús og hefur verkefnið hlotið styrk af byggðaáætlun frá árinu 2018. Með fjárstuðningi samkvæmt nýjum samningi verður nú unnt að ljúka endurbótum og koma húsnæðinu í það ástand að það nýtist allt til listsköpunar, vinnustofa listamanna, fræðslurýma og gerð listmuna.