Tæknidagur fjölskyldunnar var haldinn í Verkmenntaskóla Austurlands á Norðfirði í níunda sinn laugardaginn 13. apríl síðastliðinn. Fjöldi manns lagði leið sína í Norðfjörð til að kynna sér það helsta sem Austurland hefur upp á að bjóða á sviði tækni, vísinda, nýsköpunar, verkmennta og þróunar. Dagskráin var fjölbreytt og skemmtileg höfðaði til allra aldurshópa.
Fjöldi fyrirtækja, stofnana og félagasamtaka kynntu starfsemi sína og gátu gestir fengið margvíslegar upplýsingar um starfsemi þeirra.
Fjarðabyggð tók þátt í tæknideginum í ár og kynnti hluta af starfsemi sveitarfélagsins. Sviðsstjóri skipulags- og framkvæmdasviðs ásamt skipulags- og byggingafulltrúa voru með kynningu á þeirri víðtæku starfsemi sem fram fer á sviðinu. Veitur Fjarðabyggðar voru með kyninngu á sinni starfsemi. Þar var hægt að virða fyrir sér myndir úr stýrikerfum vatnsveitna og hitaveitu ásamt því að skoða myndir af starfseminni.
Slökkvilið Fjarðabyggðar sýndi hvernig ætti að bera sig að við að slökkva olíueld með eldvarnarteppi og fengu gestir að spreyta sig á því, ásamt því að sýna sjúkrabíl slökkviliðsins og þann búnað sem þeir hafa.
Dagurinn var ákaflega vel heppnaður og vill Fjarðabyggð koma á framfæri þökkum til starfsfólks og nemanda í Verkmenntaskóla Austurlands sem hafa veg og vanda að skipulagningu Tæknidagsins og sjá um að gera hann eins glæsilegan og raun ber vitni.
